ದುಬೈ: ಎಲ್ಲಾದರೂ ಪ್ರವಾಸಕ್ಕೆ ಹೋಗಿ ಬಂದರೆ ಅದೆಷ್ಟು ಸುಸ್ತಾಗಿ ಬಿಡುತ್ತೇವಲ್ಲವೇ? 1000 ಕಿ.ಮೀ ಪ್ರಯಾಣ ಮಾಡಿದರೆ, ಅದರ ಸುಸ್ತನ್ನು ಸುಧಾರಿಸಿಕೊಳ್ಳೋದಕ್ಕೆ ಕನಿಷ್ಟ 2-3 ದಿನ ಬೇಕು. ಆದರೆ ಈ ಯುವತಿ ಹಾಗಲ್ಲ. ಈ ಯುವತಿ ಮೂರು ದಿನದಲ್ಲಿ ಸುತ್ತಿದ್ದು ಬರೋಬ್ಬರಿ ಏಳು ಖಂಡಗಳನ್ನು! 208 ದೇಶಗಳ ನೀರು ಕುಡಿದು ಬಂದ ಈ ಯುವತಿಗೆ ಇದೀಗ ಗಿನ್ನೆಸ್ ರೆಕಾರ್ಡ್ ಕೂಡ ಸಿಕ್ಕಿದೆ.
ಅರಬ್ ಸಂಯುಕ್ತ ಸಂಸ್ಥಾನ (ಯುಎಇ)ದ ಖಾವ್ಲಾ ಅಲ್ರೊಮೈತಿ ಈ ಸಾಧನೆ ಮಾಡಿರುವ ಯುವತಿ. ಆಕೆಯ ದೇಶದಲ್ಲಿ ಸುಮಾರು 200 ದೇಶಗಳ ಜನರು ವಲಸಿಗರಾಗಿ ವಾಸಿಸುತ್ತಿದ್ದಾರೆ.
ಅವರನ್ನೆಲ್ಲ ನೋಡಿದಾಗ ಆಕೆಗೆ ತಾನೂ ಅವರ ದೇಶಗಳಿಗೆ ಹೋಗಿ ಬರಬೇಕು ಎನ್ನುವ ಆಸೆ ಮೂಡುತ್ತಿತ್ತಂತೆ. ಆ ಆಸೆಗೆ ಮನೆಯವರ ಉತ್ತೇಜನವೂ ಸಿಕ್ಕ ಹಿನ್ನೆಲೆಯಲ್ಲಿ ಈ ವರ್ಷದ ಫೆಬ್ರವರಿಯಲ್ಲಿ ದೊಡ್ಡದೊಂದು ಸಾಧನೆಗೆ ಕೈ ಹಾಕಿದ್ದಾಳೆ.
3 ದಿನ, 14 ಗಂಟೆ, 46 ನಿಮಿಷ ಮತ್ತು 48 ಸೆಕೆಂಡುಗಳಲ್ಲಿ ಖಾವ್ಲಾ ಎಳು ಖಂಡಗಳನ್ನು ಸುತ್ತಿದ್ದಾಳೆ. ಆಕೆಯ ಪ್ರಯಾಣ ಫೆಬ್ರವರಿ 13ರಂದು ಸಿಡ್ನಿಯಲ್ಲಿ ಅಂತ್ಯವಾಗಿದೆ. ಈವರೆಗೆ ಅತಿ ಕಡಿಮೆ ಸಮಯದಲ್ಲಿ ಏಳು ಖಂಡಗಳನ್ನು ಸುತ್ತಿರುವವರಲ್ಲಿ ಖಾವ್ಲಾ ಮೊದಲನೇ ಸ್ಥಾನಕ್ಕೇರಿದ್ದಾರೆ. ಅದೇ ಕಾರಣಕ್ಕೆ ಗಿನ್ನೆಸ್ ರೆಕಾರ್ಡ್ ಕೂಡ ಈಕೆಯದ್ದಾಗಿದೆ.
ಈ ರೀತಿ ಸತತ ಪ್ರಯಾಣ ಅಷ್ಟೇನು ಸುಲಭವಾಗಿರಲಿಲ್ಲ ಎನ್ನುತ್ತಾರೆ ಖಾವ್ಲಾ. ಒಂದು ವಿಮಾನವಿಳಿದು ಮತ್ತೊಂದನ್ನು ಹತ್ತಬೇಕಿತ್ತು. ಗಂಟೆಗಳ ಕಾಲ ವಿಮಾನದಲ್ಲೇ ಕೂರಬೇಕಿತ್ತು. ಆದರೆ ಅದೆಲ್ಲವೂ ನನ್ನ ಕುಟುಂಬದಿಂದಲೇ ಸಾಧ್ಯವಾಗಿದೆ. ಅವರು ನೀಡಿದ ಪ್ರೋತ್ಸಾಹದಿಂದಲೇ ನಾನು ಈ ಸಾಧನೆ ಮಾಡಲು ಸಾಧ್ಯವಾಗಿದೆ. ನನಗೆ ಗಿನ್ನೆಸ್ ರೆಕಾರ್ಡ್ ಬಂದಿರುವ ಸಂಪೂರ್ಣ ಕ್ರೆಡಿಟ್ ಅನ್ನು ನನ್ನ ದೇಶಕ್ಕೆ ಅರ್ಪಿಸುತ್ತೇನೆ ಎನ್ನುತ್ತಾರೆ ಅವರು.
