ದುಬೈ: ಹದಿನೈದನೇ ಶತಮಾನದಿಂದಲೂ ಸಾಬೂನು ತಯಾರಿಕ ಕಾರ್ಖಾನೆ ಹೊಂದಿರುವ ದುಬೈನ ಸಣ್ಣ ಕುಟುಂಬವೊಂದು ವಿಶ್ವದಲ್ಲೇ ಅತ್ಯಂತ ದುಬಾರಿ ಸಾಬೂನು ತಯಾರಿಸಿರುವುದಾಗಿ ಹೇಳಿಕೊಂಡಿದೆ.
ಸಾಬೂನಿನ ಬೆಲೆ 2,800 ಅಮೆರಿಕ ಡಾಲರ್ ಆಗಿದ್ದು, ಭಾರತೀಯ ಕರೆನ್ಸಿ ಪ್ರಕಾರ ಬರೋಬ್ಬರಿ 2,06,955 ರೂ. ವೆಚ್ಚವಾಗುತ್ತದೆ. ಹ್ಯಾಂಡ್ಮೇಡ್ ಸಾಬೂನಿನ ಬ್ರ್ಯಾಂಡ್ ಆಗಿರುವ “ಖಾನ್ ಐ ಸಾಬೂನ್” ಕಂಪನಿಯನ್ನು ಲೆಬನಾನ್ ಮತ್ತು ತ್ರಿಪೋಲಿ ಮೂಲದ ಬ್ಯಾಡರ್ ಆ್ಯಂಡ್ ಸನ್ಸ್ ಸೃಷ್ಟಿಸಿದೆ.
ಈ ಕಂಪನಿ ವಿವಿಧ ರೀತಿಯ ದುಬಾರಿ ಸಾಬೂನು ತಯಾರಿಸುತ್ತದೆ. ಇಷ್ಟೇ ಅಲ್ಲದೆ, ಸ್ವಾಭಾವಿಕ ಸುಗಂಧದ್ರವ್ಯ ಮತ್ತು ಅಗತ್ಯ ಎಣ್ಣೆಗಳು ಸೇರಿದಂತೆ ಅನೇಕ ಚರ್ಮ ರಕ್ಷಕ ಉತ್ಪನ್ನಗಳನ್ನು ಕಂಪನಿ ತಯಾರಿಸುತ್ತದೆ.
ಕಂಪನಿಯ ವಿಶೇಷ ಉತ್ಪನ್ನಗಳನ್ನು ದುಬೈ ಮತ್ತು ಯುಎಇನ ಪ್ರಮುಖವಾದ ಸ್ಟೋರ್ಗಳಲ್ಲಿ ಮಾತ್ರ ನೋಡಬಹುದು ಮತ್ತು ಖರೀದಿಸಬಹುದು. ಆದಾಗ್ಯು ದುಬಾರಿ ಉತ್ಪನ್ನಗಳು ಕೇವಲ ವಿಶೇಷ ವ್ಯಕ್ತಿಗಳು ಮತ್ತು ಗಣ್ಯರಿಗೆ ಮಾತ್ರ ಮಾಡಲ್ಪಟ್ಟಿದೆ. ಇಂತಹ ದುಬಾರಿ ಸಾಬೂನನ್ನು ಮೊದಲ ಬಾರಿಗೆ 2013ರಲ್ಲಿ ಮಾಡಲಾಯಿತು. ಬಳಿಕ ಅದನ್ನು ಕತಾರ್ನ ಪ್ರಥಮ ಮಹಿಳೆಗೆ ಉಡುಗೊರೆಯಾಗಿ ನೀಡಲಾಗಿತ್ತು.
ದುಬಾರಿ ಸಾಬೂನನ್ನು ಚಿನ್ನ ಮತ್ತು ವಜ್ರದ ಪುಡಿಯಿಂದ ಮಾಡಲಾಗುತ್ತದೆ. ನೋಡಲು ಚೀಸ್ ರೂಪದಲ್ಲಿ ಕಂಡರೂ ದುಬಾರಿ ಚೀಸ್ ತುಣುಕನ್ನು ಸಾಬೂನಿನಲ್ಲಿ ಬಳಸಲಾಗಿರುತ್ತದೆ. 17 ಗ್ರಾಂ 24 ಕ್ಯಾರೆಟ್ ಗೋಲ್ಡ್, ಕೆಲವೇ ಗ್ರಾಂ ಡೈಮಂಡ್ ಪೌಡರ್, ಸಾವಯವ ಜೇನು, ಶುದ್ಧವಾದ ಆಲಿವ್ ಎಣ್ಣೆ, ಖರ್ಜುರ ಸೇರಿದಂತೆ ಮುಂತಾದ ವಿಶೇಷ ಪದಾರ್ಥಗಳಿಂದ ಸಾಬೂನು ತಯಾರಿಸಲಾಗಿದೆ.
